తెల్లవారింది.
ఎవరికీ ఉపశమనంగా లేదు.
గత రాత్రి జరిగిన భయంకరమైన సంఘటనలు ఇంకా అందరి కళ్ల ముందూ తిరుగుతూనే ఉన్నాయి.
రెన్‌ఫీల్డ్ చనిపోయాడు.
మినాపై డ్రాకులా దాడి చేశాడు. తరువాత
కౌంట్ డ్రాకులా తప్పించుకున్నాడు.
జోనాథన్ తన భార్య పక్కనే కూర్చుని ఉన్నాడు.
అతని కళ్లు మినాను వదిలి వెళ్లడం లేదు.
మినా నుదుటిపై ఆ గుర్తు ఇంకా అలాగే ఉన్నది.
వాన్ హెల్సింగ్ పవిత్రమైన వస్తువును ఆమె నుదుటిపై తాకించినప్పుడు ఏర్పడిన భయంకరమైన ముద్ర అది.
జోనాథన్ దానిని చూసిన ప్రతిసారీ…
కోపం ఉప్పొంగుతున్నది.
ఒకప్పుడు డ్రాకులా కోట నుంచి ఎలాగో ప్రాణాలతో తప్పించుకున్నాడు.
ఆ భయంకరమైన అనుభవం అక్కడితో ముగిసిపోయిందని అనుకున్నాడు.
కాని డ్రాకులా అతనిని వదల్లేదు.
జోనాథన్ కొత్త జీవితంలోకి కూడా వచ్చాడు.
జొనాథన్ ప్రపంచంలో అందరికంటే ఎక్కువగా ప్రేమించే మినాపై డ్రాకులా దాడి చేశాడు.
దానిని జోనాథన్ ఎప్పటికీ క్షమించలేడు.
మినా కూడా లోలోపల తీవ్రంగా కదిలిపోయింది.
కాని నిరాశలో కూలిపోవడానికి ఆమె సిద్ధంగా లేదు.
డ్రాకులా తనకు ఏం చేశాడో ఆమెకు తెలుసు.
అతను తన రక్తాన్ని తాగాడు.
అంతకంటే భయంకరంగా…
తన రక్తాన్ని ఆమెతో బలవంతంగా తాగించాడు.
అది జ్ఞాపకం వచ్చిన ప్రతిసారీ మినాకు ఒళ్లు జలదరిస్తున్నది.
తనను పట్టుకున్న డ్రాకులా చేతులు ఆమెకు గుర్తున్నాయి.
కొన్ని అడుగుల దూరంలోనే స్పృహ లేకుండా పడిపోయిన జోనాథన్ గుర్తున్నాడు.
డ్రాకులా గొంతు గుర్తున్నది.
అతని మాటలు గుర్తున్నాయి. ఇంకా ఆమె మనసులో ఆ భయం ఉన్నది.
కాని …
ఆ భయంతో పాటు మరో భావన కూడా బలంగా పెరుగుతున్నది.
పట్టుదల.
డ్రాకులాను నాశనం చేయడానికి తాను ఏ విధంగానైనా సహాయం చేయగలిగితే…
తప్పకుండా చేస్తుంది.
తన భయాన్ని ఉపయోగించి డ్రాకులా మిగతా వారిని బలహీనపరచడానికి ఆమె అనుమతించదు.
మినాను వాన్ హెల్సింగ్ చాలా జాగ్రత్తగా గమనిస్తున్నాడు.
అతనిలో తీవ్రమైన ఆందోళన ఉన్నది.
డ్రాకులా ప్రభావం మినాలో ఎంత వేగంగా పెరుగుతున్నదో అతనికి తెలియదు.
లూసీ పరిస్థితి వేరు.
ఆమె చనిపోవడానికి ముందు డ్రాకులా పదే పదే ఆమెపై దాడి చేశాడు.
కాని మినా విషయంలో…
డ్రాకులా కావాలనే తన రక్తాన్ని ఆమె శరీరంలోకి పంపించాడు.
ఇప్పుడు వారిద్దరి మధ్య ఒక బంధం ఏర్పడింది.
ఆ బంధం ఎంత బలమైనది?
కాలం గడిచేకొద్దీ అది ఎలా ఉంటుంది? ఎలా పరిణమిస్తుంది ?
ఎవరికీ తెలియదు.
అదే విషయం వాన్ హెల్సింగ్‌ను మరింత భయపెడుతున్నది.
వారు ఇక వేచి ఉండలేరు. డ్రాకులాను నాశనం చేయాలి.
అందరూ ఒకచోట చేరారు.
జోనాథన్.
వాన్ హెల్సింగ్.
డాక్టర్ సీవర్డ్.
ఆర్థర్.
క్విన్సీ మోరిస్.
ఇక ఏం చేయాలో చర్చించడం ప్రారంభించారు.
కొన్ని గంటల క్రితమే డ్రాకులా వారి మధ్యలోకి వచ్చాడు.
మినాపై దాడి చేశాడు.
అంటే…
తాము తనను వేటాడుతున్నామని డ్రాకులాకు స్పష్టంగా తెలుసు.
తన రహస్య స్థావరాలను వారు వెతుకుతుంటే…
అతను నిశ్శబ్దంగా చూస్తూ కూర్చోడు. .
అతను పోరాడతాడు.
వారిని మోసం చేయడానికి ప్రయత్నిస్తాడు.
మళ్లీ దాడి చేయవచ్చు.
అందుకే…
ఇక వారు మరింత వేగంగా కదలాలి.
జోనాథన్ తాను సేకరించిన సమాచారాన్ని బయటకు తీశాడు.
డ్రాకులా తీసుకువచ్చిన మట్టి పెట్టెలు.
ఇప్పటికీ అవే వారి వేటలో ప్రధానమైనవి.
డ్రాకులాకు విశ్రాంతి తీసుకోవడానికి ఆ పెట్టెలు అవసరం.
కొన్ని కార్ఫాక్స్‌లో ఉన్నాయి.
మరికొన్నింటిని వేరే ఇళ్లకు తరలించారు.
వాటిలో చాలావరకు ఎక్కడున్నాయో వారు తెలుసుకున్నారు.
కాని …
అన్నింటినీ ఇంకా కనుగొనలేదు.
డ్రాకులాకు అందుబాటులో ఉన్న ప్రతి పెట్టె…
అతనికి మరో రహస్య స్థావరం.
మరో సురక్షితమైన విశ్రాంతి ప్రదేశం.
వాన్ హెల్సింగ్ తన నిర్ణయాన్ని చెప్పాడు.
ప్రతి పెట్టెను ఒక్కొక్కటిగా డ్రాకులాకు పనికిరాకుండా చేయాలి.
చివరకు…
అతనికి దాక్కోవడానికి ఒక్క సురక్షితమైన ప్రదేశం కూడా మిగలకూడదు.
వారు బయలుదేరే ముందు మినా వారితో మాట్లాడింది.
తన గురించి వాళ్లు ఆందోళన చెందుతున్నారని ఆమెకు తెలుసు.
ఈసారి కూడా తనను వదిలేసి…
ముఖ్యమైన విషయాలను తనకు చెప్పకుండా ఉండాలని వారు అనుకోవచ్చునని తెలుసు.
కాని ఆమె స్పష్టంగా చెప్పింది.
ఇక తన నుంచి ముఖ్యమైన విషయాలు దాచవద్దని కోరింది.
ఎందుకంటే…
ఇంతకు ముందు అదే తప్పు చేశారు.
తనను రక్షించాలనే ఉద్దేశంతో వారి ప్రణాళికల నుంచి ఆమెను దూరంగా ఉంచారు. దానినే డ్రాకులా అవకాశంగా చేసుకున్నాడు.
అతను తన దగ్గరకు వచ్చాడు.
తనపై దాడి చేశాడు.
“నేను నిజం తెలుసుకోలేనంత బలహీనురాలిని కాదు,” అనే భావన ఆమె మాటల్లో స్పష్టంగా ఉన్నది.
ఇప్పుడు తాను కూడా ఈ యుద్ధంలో భాగమే.
వారికి ఇష్టం ఉన్నా…
లేకపోయినా.
వాన్ హెల్సింగ్‌కు మినా మాటలు అర్థమయ్యాయి.
కాని మరో ప్రమాదం కూడా ఉన్నది. మీనాను డ్రాకులా ఏదో విధంగా ప్రభావితం చేయగలిగితే ఆందోళన కలిగించే అంశమే .
డ్రాకులా కూడా మినా ద్వారా కొన్ని విషయాలు తెలుసుకోగలడేమో.
అందుకే…
ఆమెకు ఏ సమాచారం చెప్పాలో చాలా జాగ్రత్తగా నిర్ణయించాలి.
అది మినాపై నమ్మకం లేక కాదు.
ఆమెను వారందరూ పూర్తిగా నమ్ముతున్నారు.
కాని డ్రాకులా ఆమె శరీరం, మనసులోకి ఒక దారి సృష్టించాడు.
ఆ దారిని అతను ఎలా ఉపయోగించగలడో ఎవరికీ తెలియదు.
జోనాథన్‌కు ఆ ఆలోచనే నచ్చలేదు.
మినా అతని భార్య.
అతనికి ఆమెపై పూర్తి నమ్మకం ఉన్నది.
విషయాన్ని అతనికి వాన్ హెల్సింగ్ అర్థమయ్యేలా చెప్పాడు.
“ఇది నమ్మకం గురించి కాదు.”
మినా జీవితంలోని అత్యంత వ్యక్తిగతమైన ప్రదేశంలోకి డ్రాకులా చొరబడ్డాడు.
ఆమె శరీరం లోపలికీ.
వారిద్దరి మధ్య ఏర్పడిన బంధం గురించి పూర్తిగా తెలుసుకునే వరకు…
డ్రాకులా దానిని తనకు అనుకూలంగా ఉపయోగించగలడని భావించ వలసిందే.
జోనాథన్ కంటే ముందే మినా ఆ నిజాన్ని అర్థం చేసుకున్నది.
ఆమె ప్రశాంతంగా చెప్పింది.
“నాకు ఏదైనా చెప్పకుండా ఉండటం ద్వారా అతనిని నాశనం చేయడానికి మీకు అవకాశం వస్తుందంటే…
అలాగే చేయండి.”
జోనాథన్ బాధగా ఆమె వైపు చూశాడు.
మినా అతని చేతిని పట్టుకున్నది.
ఇద్దరికీ అర్థమైనది.
ఇక డ్రాకులా వేట నియమాలు మారిపోయాయి.
అందరూ మళ్లీ కార్ఫాక్స్‌కు వెళ్లడానికి సిద్ధమయ్యారు.
ఈసారి వారు అక్కడికి పరిశోధన కోసం వెళ్లడం లేదు.
డ్రాకులా సురక్షిత స్థావరాలపై దాడి చేయడానికి వెడుతున్నారు.
వాన్ హెల్సింగ్ అవసరమైన పవిత్రమైన వస్తువులను తీసుకున్నాడు.
మిగతా వారు పనిముట్లను సిద్ధం చేసుకున్నారు.
ఎప్పుడు ప్రమాదం ముంచుకు వస్తుందోనని క్విన్సీ సిద్ధంగా ఉన్నాడు.
ఆర్థర్ ఎక్కువగా మాట్లాడలేదు.
అతని ఆలోచనలు ఇంకా లూసీ దగ్గరే ఉన్నాయి.
డ్రాకులాను నాశనం చేసే దిశగా వేసే ప్రతి అడుగు…
లూసీకి న్యాయం చేయడానికి వేసే అడుగులా అతనికి అనిపిస్తున్నది.
సీవర్డ్‌కు రెన్‌ఫీల్డ్ గుర్తొచ్చాడు.
అతను వారిని హెచ్చరించడానికి ప్రయత్నించాడు.
ఇప్పుడు…
డ్రాకులా కారణంగా అతను కూడా చనిపోయాడు.
ఈ పోరాటాన్ని ముగించడానికి వారికి ఇప్పుడు మరిన్ని దారులు ఉన్నాయి.
వారు కార్ఫాక్స్‌కు చేరుకున్నారు.
పగటి వెలుగులో ఆ పాత ఇల్లు రాత్రిలో కనిపించినంత భయంకరంగా లేదు.
కాని దాని రూపాన్ని చూసి వారిలో ఎవరూ మోసపోలేదు.
అక్కడ ఎవరు విశ్రాంతి తీసుకున్నారో వారికి తెలుసు.
ఇంకా లోపల ఏం ఉండవచ్చునో కూడా వారికి తెలుసు.
భవనం అంతా నిశ్శబ్దంగా ఉన్నది.
గదులన్నీ దుమ్ముతో నిండిపోయాయి.
గాలి కూడా పాత వాసనతో బరువుగా ఉన్నది.
వారు తెరిచే ప్రతి తలుపు…
మరింత చీకటిలోకి తీసుకు వెడుతున్నట్టుగా అనిపిస్తున్నది.
జోనాథన్‌కు పాత జ్ఞాపకాలు గుర్తుకు వస్తున్నాయి .
“డ్రాకులా కోట. “
అక్కడి నిశ్శబ్దం.
తాళం వేసిన గదులు.
ఖాళీ దారులు.
దగ్గరలో ఎవరో తనను గమనిస్తున్నారనే భయంకరమైన అనుభూతి.
కాని జోనాథన్ ఆ జ్ఞాపకాలను పక్కకు నెట్టేశాడు.
ఇప్పుడు అతను బందీ కాదు.
అతని పక్కన స్నేహితులు ఉన్నారు.
వారు ఇక్కడికి భయపడటానికి రాలేదు.
పోరాడటానికి వచ్చారు.
చివరకు డ్రాకులా పెట్టెలు ఉంచిన ప్రదేశానికి వాళ్లు చేరుకున్నారు.
భారీ చెక్క పెట్టెలు వారి ముందు ఉన్నాయి.
ప్రతి పెట్టెలోనూ…
ట్రాన్సిల్వేనియా నుంచి తీసుకొచ్చిన నల్లటి మట్టి.
సాధారణ వ్యక్తికి అవి విచిత్రమైన సరుకులా మాత్రమే కనిపిస్తాయి.
కాని వాన్ హెల్సింగ్‌కు…
అవి డ్రాకులా ఆశ్రయాలు.
అతను విశ్రాంతి తీసుకునే ప్రదేశాలు.
వాటిని నాశనం చేయాలి.
కాని కాల్చడం ద్వారా కాదు.
పగలగొట్టడం ద్వారా కాదు.
దానికి ప్రత్యేకమైన పద్ధతి ఉన్నది.
వాన్ హెల్సింగ్ ఒక పెట్టెను తెరిచాడు.
ఒక పవిత్రమైన ‘వేఫర్ ‘ తీసుకున్నాడు.
దానిలో కొంత భాగాన్ని చాలా జాగ్రత్తగా పెట్టెలోని మట్టిలో ఉంచాడు.
ఏమీ జరగలేదు.
పేలుడు లేదు.
పొగ లేదు.
బయటకు కనిపించే మార్పు కూడా లేదు.
కాని…
వాన్ హెల్సింగ్‌కు ఏం జరిగిందో తెలుసు.
ఆ మట్టి ఇప్పుడు పవిత్రమైనది.
డ్రాకులా ఇక అందులో విశ్రాంతి తీసుకోలేడు.
అతని ఒక రహస్య ఆశ్రయం నిర్వీర్యం అయిపోయింది.
తరువాత రెండో పెట్టె.
మూడో పెట్టె.
మరో పెట్టె.
ఇలా ఒక్కొక్కటిగా…
వాన్ హెల్సింగ్ అదే పని చేశాడు.
జోనాథన్ జాగ్రత్తగా చూస్తున్నాడు.
ప్రతి పెట్టె డ్రాకులాకు పనికిరాకుండా మారుతున్న కొద్దీ…
అతని శక్తి కొంచెం కొంచెంగా తగ్గుతున్నట్టుగా జోనాథన్‌కు అనిపించింది.
ఇన్ని నెలలుగా డ్రాకులా వారికి అందనంత శక్తివంతుడిగా కనిపించాడు.
పొగమంచులా మాయమయ్యే జీవి.
తోడేళ్లను నియంత్రించగల జీవి.
గోడలపై పాకగల జీవి.
తన బాధితులకు ఏం జరుగుతున్నదో అర్థమయ్యేలోపే వారి జీవితాలను నాశనం చేసే రాక్షసుడు.
కాని ఇప్పుడు…
అతనికి అవసరమైన ఒక ముఖ్యమైన విషయం వారికి తెలిసిపోయింది.
ఇప్పుడు…
దానినే అతని నుంచి తీసేస్తున్నారు.
వారు పెట్టెలను మళ్లీ లెక్కించారు.
సంఖ్య చాలా ముఖ్యం.
జోనాథన్ రికార్డులతో అక్కడ ఉన్న పెట్టెలను పోల్చి చూశారు.
కొన్ని ఇక్కడ ఉన్నాయి.
మరికొన్ని వేరే ప్రదేశాల్లో ఉన్నాయని ఇప్పటికే తెలుసుకున్నారు.
కాని …
ఇంకా కొన్నింటి ఆచూకీ తెలియవలసి ఉన్నది .
అంటే…
డ్రాకులాకు ఇంకా దాక్కునే ప్రదేశాలు ఉన్నాయి.
వారి పని ఇంకా పూర్తికాలేదు.
మిగతా ఇళ్లకు వెళ్లడానికి సిద్ధమయ్యారు.
సమయం చాలా ముఖ్యం.
పగటి వెలుగు వారికి ఉపయోగకరంగా ఉన్నది.
సూర్యుడు ఉన్నంతసేపు డ్రాకులా స్వేచ్ఛగా కదలడం కష్టం.
అందుకే చీకటి పడకముందే వీలైనంత పని పూర్తి చేయాలి.
జోనాథన్ తన నోట్స్ పరిశీలించాడు.
అందులో అత్యంత ముఖ్యమైన ప్రదేశాల్లో ఒకటి…
పికడిల్లీలో ఉన్న డ్రాకులా ఇల్లు.
కాని కార్ఫాక్స్‌లోకి ప్రవేశించడం వేరు.
లండన్ నగరం మధ్యలో ఉన్న ఆ ఇంట్లోకి ప్రవేశించడం వేరు.
చుట్టూ ఇళ్లు ఉన్నాయి.
వీధుల్లో జనాలు ఉన్నారు.
పోలీసులు ఉన్నారు.
వారు తలుపు పగలగొట్టి లోపలికి వెళితే…
వెంటనే అందరి దృష్టి వారిపై పడుతుంది.
అందుకే మరో మార్గం కావాలి.
ఇక్కడ ఆర్థర్ వారికి చాలా ఉపయోగపడ్డాడు.
అతని సామాజిక స్థాయి వల్ల అధికారులతో, వ్యాపారులతో ధైర్యంగా మాట్లాడగలడు.
వారందరూ గౌరవప్రదమైన వ్యక్తుల్లా కనిపించగలరు.
ఆ ఇంట్లో తమకు చట్టబద్ధమైన పని ఉన్నట్టుగా మాట్లాడగలరు.
దొంగల్లా దాక్కుంటూ వెళ్లే బదులు…
లండన్‌లోని సాధారణ వ్యవస్థలనే డ్రాకులాపై ఆయుధంగా ఉపయోగించవచ్చు.
ఆ ఆలోచనలోనే ఒక విచిత్రమైన వ్యంగ్యం ఉన్నది.
వారు ఒక పురాతన వాంపైర్‌ను వేటాడుతున్నారు.
కాని దానికి ఉపయోగిస్తున్నవి…
ఆస్తి రికార్డులు.
చిరునామాలు.
తాళాలు తెరిచే పనివాళ్లు.
వ్యాపార లావాదేవీలు.
డ్రాకులా పాత కోటలు, పురాతన మూఢనమ్మకాల ప్రపంచానికి చెందినవాడు కావచ్చు.
కాని ఇప్పుడు అతను ఆధునిక లండన్‌లో నివసిస్తున్నాడు.
ఆధునిక నగరంలో…
ప్రతి పని ఏదో ఒక ఆధారాన్ని వదిలిపెడుతుంది.
చివరకు వారు పికడిల్లీలోని ఇంట్లోకి ప్రవేశించగలిగారు.
చాలా జాగ్రత్తగా లోపలికి వెళ్లారు.
జోనాథన్ గుండె వేగంగా కొట్టుకుంటున్నది.
డ్రాకులా అక్కడే ఉంటే?
అతని రహస్య స్థావరంలోకి నేరుగా నడుచుకుంటూ వెడుతున్నట్టే.
కాని గదులన్నీ నిశ్శబ్దంగా ఉన్నాయి.
వారిని పలకరించడానికి పనివాళ్లు ఎవరూ లేరు.
సాధారణంగా మనుషులు నివసించే ఇంట్లో ఉండే శబ్దాలు ఏవీ వినిపించడం లేదు. అయినప్పటికీ ఏదో సరిగా లేదనే భావన అందరికీ కలిగింది.
చాలా జాగ్రత్తగా ముందుకు కదిలారు.
క్విన్సీ ఎప్పుడైనా దాడి జరిగితే ఎదుర్కోవడానికి సిద్ధంగా ఉన్నాడు.
ఆర్థర్ తలుపులను గమనిస్తున్నాడు.
సీవర్డ్ ఏ చిన్న శబ్దం వినిపించినా పట్టుకోవడానికి ప్రయత్నిస్తున్నాడు.
వాన్ హెల్సింగ్ ముందుండి వారిని తీసుకు వెడుతున్నాడు.
చివరకు…
వారు వెతుకుతున్నవి కనిపించాయి.
మరికొన్ని మట్టి పెట్టెలు.
మళ్లీ వాటిని తెరిచారు.
మళ్లీ వాన్ హెల్సింగ్ పవిత్రమైన వేఫర్‌ను ఉపయోగించాడు.
ఒక్కొక్క పెట్టె…
డ్రాకులాకు పనికిరాకుండా మారుతున్నది.
వారు చాలా వేగంగా పనిచేశారు.
ప్రతి నిమిషం విలువైనది.
జోనాథన్ పెట్టెలను లెక్కిస్తున్నాడు.
తన రికార్డులతో సంఖ్యను పోల్చుతున్నాడు.
వారు లక్ష్యానికి చాలా దగ్గరగా వస్తున్నారు.
డ్రాకులా సురక్షితంగా విశ్రాంతి తీసుకునే ప్రతి ప్రదేశాన్ని తొలగించే దిశగా ముందుకు సాగుతున్నారు.
కాని…
ఇంకా సంఖ్య సరిపోలేదు.
ఇంకా ఒక పెట్టె ఆచూకీ వారికి తెలియవలసి ఉన్నది .
ఎక్కడో…
డ్రాకులాకు ఇంకా ఒక సురక్షితమైన ఆశ్రయం ఉన్నది.
ఆ ఇంట్లో వారికి మరో ముఖ్యమైన విషయం కూడా దొరికింది.
కొన్ని పత్రాలు.
తాళాలు.
డ్రాకులాకు చెందిన ఇతర ఇళ్లను గుర్తించడానికి ఉపయోగపడే సమాచారం.
తన ఇళ్లు తనను రక్షిస్తాయని డ్రాకులా భావించాడు.
కాని ఇప్పుడు…
అవే అతని కదలికలను చూపించే పటంలా మారుతున్నాయి.
వేటగాళ్లు నెమ్మదిగా…
అతని చుట్టూ వల బిగిస్తున్నారు.
కాని వాన్ హెల్సింగ్ మిగిలిన వారిని హెచ్చరించాడు.
ఇప్పుడే గెలిచామని అనుకోవద్దు.
గాయపడిన జంతువు ప్రమాదకరమైనది.
తప్పించుకునే మార్గం లేని జంతువు…
అంతకంటే ప్రమాదకరమైనది.
డ్రాకులా సాధారణ జంతువు కాదు.
అతను అత్యంత తెలివైనవాడు. శక్తివంతుడు.
తన ఆశ్రయాలపై వారు దాడి చేస్తున్నారని అతనికి తెలుసు.
వారి ప్రణాళిక ఏమిటో కూడా అతను ఇప్పటికే అర్థం చేసుకుని ఉండవచ్చు.
ఇలా ఒక్కొక్క సురక్షిత ప్రదేశాన్ని తొలగిస్తూ వెడితే…
ఏదో ఒక సమయంలో డ్రాకులా తప్పకుండా స్పందిస్తాడు.
అప్పుడు…
తనలో ఉన్న పూర్తి బలంతో…
పూర్తి క్రూరత్వంతో…
వారిపై దాడి చేస్తాడు.
ఇదంతా జరుగుతుండగా…
మినా మానసిక ఆసుపత్రిలో ఎదురు చూస్తున్నది.
ప్రశాంతంగా ఉండటానికి ప్రయత్నిస్తున్నది.
కాని తనలో ఏదో మార్పు జరుగుతున్నదనే భావన ఆమెను వదలడం లేదు.
కొన్నిసార్లు ఒక్కసారిగా బలహీనంగా అనిపిస్తున్నది.
మరికొన్నిసార్లు ఆలోచనలు తన నియంత్రణ నుంచి జారిపోతున్నట్టుగా అనిపిస్తున్నది.
ఎక్కడో చాలా దూరం నుంచి…
ఏదో తన మనసును లాగుతున్నట్టుగా అనిపిస్తున్నది.
అది తన భయమా?
లేక…
డ్రాకులా ప్రభావమా?
ఆమెకు తెలియదు.
అదే అనిశ్చితి ఆమెకు ఆందోళన కలిగిస్తున్నది .
మినా తన నుదుటిపై ఉన్న గుర్తును చూసుకున్నది.
ఆమెకు లూసీ గుర్తొచ్చింది.
తన ప్రాణస్నేహితురాలికి ఏమి జరిగిందో తెలుసు.
అందుకే మనసులో ఒక నిర్ణయం తీసుకున్నది.
తనలో పోరాడే శక్తి ఉన్నంతవరకూ పోరాడుతూనే ఉంటుంది.
జోనాథన్ తిరిగి వచ్చినప్పుడు…
వారు ఏదో సాధించారని అతని ముఖం చూడగానే మినాకు అర్థమైనది.
అతను ప్రతి విషయం చెప్పాల్సిన అవసరం లేదు.
అతని ముఖంలో పట్టుదల కనిపిస్తున్నది.
డ్రాకులా తనపై దాడి చేసిన తరువాత…
మొదటిసారిగా జోనాథన్‌కు తమ శత్రువును నిజంగా గాయపరిచినట్టుగా అనిపించింది.
శారీరకంగా కాదు.
అతని ప్రణాళికను దెబ్బతీశారు.
ఇప్పుడు డ్రాకులాకు దాక్కోవడానికి తక్కువ ప్రదేశాలు ఉన్నాయి.
మినాకు కొంత ఉపశమనం కలిగింది. జోనాథన్ ఎంతగా అలసిపోయాడో కూడా ఆమెకు కనిపించింది.
జోనాథన్ వచ్చి ఆమె పక్కన కూర్చున్నాడు.
కొంతసేపు ఇద్దరూ ఏమీ మాట్లాడలేదు.
అప్పుడు…
అతని చూపు మినా నుదుటిపై ఉన్న గుర్తుపై పడింది.
వెంటనే అతని ముఖంలో మళ్లీ కోపం కనిపించింది.
మినా అది గమనించింది.
మెల్లగా అతని చేతిని పట్టుకున్నది.
జోనాథన్ చూపు తిప్పుకున్నాడు.
తాను ఎంతగా భయపడుతున్నాడో మినాకు తెలియనివ్వాలని అనుకున్నాడు.
అతనికి తన ప్రాణం గురించి భయం లేదు.
మినాను కోల్పోతానేమో అన్నదే అతని భయం.
తరువాత వాన్ హెల్సింగ్ అందరినీ మళ్లీ ఒకచోట చేర్చాడు.
తమకు తెలిసిన విషయాలన్నింటినీ మరోసారి పరిశీలించారు.
డ్రాకులా మట్టి పెట్టెల్లో చాలా వరకు ఇప్పుడు అతనికి పనికిరావు.
అది పెద్ద విజయం.
కాని …
కనిపించని ఆ చివరి పెట్టె ఇంకా పెద్ద సమస్యగానే ఉన్నది.
డ్రాకులాకు ఒక్క సురక్షితమైన విశ్రాంతి ప్రదేశం ఉన్నా చాలు.
అతను వారి నుంచి తప్పించుకోగలడు.
అందుకే…
ఆ పెట్టెను కనుగొనాలి.
డ్రాకులా స్వయంగా ఎక్కడున్నాడో కూడా తెలుసుకోవాలి.
వేటలో తరువాత దశ…
ఇప్పటివరకు జరిగిన దాని కంటే మరింత ప్రమాదకరంగా ఉండబోతున్నది.
ఇప్పుడు వారు గుడ్డిగా వెతకడం లేదు.
డ్రాకులాను నెమ్మదిగా ఒక మూలకు నెట్టుతున్నారు.
ఏదో ఒక సమయంలో…
వేటగాళ్లు, వేటాడబడుతున్న డ్రాకులా ముఖాముఖిగా కలవవలసి రావచ్చు.
ఆ రోజు కూడా వేగంగా గడిచిపోయింది.
సూర్యకాంతి నెమ్మదిగా తగ్గుతున్నది.
లండన్ వీధులపై నీడలు పొడవుగా మారుతున్నాయి.
జనం తమ ఇళ్లకు తిరిగి వెడుతున్నారు.
దీపాలు వెలుగుతున్నాయి.
తలుపులు మూసుకుంటున్నాయి.
మిగతా ప్రపంచానికి…
అది మరో సాధారణ సాయంత్రం మాత్రమే.
కాని జోనాథన్, వాన్ హెల్సింగ్, సీవర్డ్, ఆర్థర్, క్విన్సీ, మినాలకు…
సూర్యాస్తమయం అంటే వేరే అర్థం.
డ్రాకులా శక్తిని పుంజుకునే సమయం.
ఎక్కడో లండన్‌లో…
కౌంట్ మేల్కొంటున్నాడు.
అతని విశ్రాంతి ప్రదేశాల్లోకి శత్రువులు ప్రవేశించారు.
అతని స్వదేశపు మట్టిని అతనికి పనికిరాకుండా చేశారు.
ఒకప్పుడు నిస్సహాయమైన బాధితులుగా భావించిన మనుషులు…
ఇప్పుడు అతనితో ఎలా పోరాడాలో నేర్చుకున్నారు.
వారు ఎవరో డ్రాకులాకు తెలుసు.
జోనాథన్ తెలుసు.
వాన్ హెల్సింగ్ తెలుసు.
లూసీని అతని శాపం నుంచి విముక్తి చేసిన మనుషులు తెలుసు.
అన్నింటికంటే ముఖ్యంగా…
“మినా తెలుసు.”
వారిద్దరి మధ్య ఏర్పడిన ఆ భయంకరమైన బంధం ఇంకా ఉన్నది.
ఆ రోజు వేటగాళ్లు ఒక ముఖ్యమైన విజయం సాధించారు.
వాన్ హెల్సింగ్‌కు నిజం తెలుసు.
వారు డ్రాకులాను బలహీనపరిచారు. కాని
ప్రమాదం లేని జీవిగా అతనిని మార్చలేదు.
దానికి బదులుగా…
అతనిని నిస్సహాయంగా మార్చారు.
డ్రాకులా దాక్కునే చాలా ప్రదేశాలను వారు నాశనం చేశారు.
ఇప్పుడు మిగిలిన చివరి ఆశ్రయాన్ని కనుగొనాలి.
డ్రాకులా ఎక్కడున్నాడో తెలుసుకోవాలి.
అది కూడా…
మినాలో పెరుగుతున్న ఆ చీకటి మరింత బలపడకముందే.
ఎందుకంటే ఇప్పుడు వారు కేవలం ప్రతీకారం కోసం డ్రాకులాను వేటాడటం లేదు.
వారు కాలంతో పోటీ పడుతున్నారు.
వారు ఆలస్యం చేస్తే…
మినాకు కూడా లూసీకి ఎదురైన భయంకరమైన పరిస్థితి రావచ్చు.
దానిని ఎదుర్కొనడానికి.
వారిలో ఒక్కరూ కూడా సిద్ధంగా లేరు.